தூத்துக்குடி.
வடகிழக்கு பருவமழை தொடங்கிய நிலையில், அவ்வப்போது மிதமான மற்றும் கனமழை பெய்து வருகிறது. இந்நிலையில் டிட்வா புயல் உருவானதையொட்டி தென்தமிழகத்தின் கடற்கரை பகுதி மாவட்டங்களில் கடந்த இரு நாட்களாக தொடர் மழை பெய்து வருகிறது. தூத்துக்குடி மாநகராட்சிக்குட்பட்ட பகுதிகளில் பெய்து வரும் மழையின் அளவை மாநகராட்சி நிர்வாகம் மூலம் ஒவ்வொரு பகுதிகளின் நிலை என்ன என்பதை கண்காணிக்கப்பட்டு 3 டிவிஷனாக பிரிக்கப்பட்டு மாநகராட்சி அதிகாரிகள் அலுவலர்கள் முழுவீச்சில் கண்காணிப்பு பணியில் ஈடுபட்டு வருகின்றனர்.
இந்நிலையில், புறநகர் பகுதியிலிருந்து வெள்ளநீர் ஊருக்குள் வராமல் இருப்பதற்காக மாவட்ட கலெக்டர் அலுவலகம் முன்புள்ள ஓடை பகுதி, முத்துகிருஷ்ணாநகர், அன்னை தெரேசா நகர், கதிர்வேல்நகர், 4ம் கேட் பகுதியில் வடிகால், மேட்டுபட்டி மற்றும் சங்குகுழி கடற்கரை, எட்டையாபுரம் ரோடு, ஹவுசிங்போர்டு உள்ளிட்ட பல்வேறு பகுதிகளில் சுழற்சி முறையில் நீர் வழித்தடங்களில் மழைநீர் முறையாக செல்கிறதா என்பது குறித்து இரவு முழுவதும் மேயர் ஜெகன் பெரியசாமி கொட்டும் மழையில் ஒரு கையில் கொடை பிடித்துக்கொண்டும், மற்றொரு கையில் டார்ச் லைட் அடித்துக்கொண்டு நீரோட்டத்தின் பகுதிகளை ஆய்வு மேற்கொண்டார்.
பின்னர், மேயர் ஜெகன் பெரியசாமி கூறுகையில்: தமிழக முதலமைச்சர் மு.க.ஸ்டாலின் உத்திரவிற்கிணங்க, மாநகராட்சிக்குட்பட்ட 60 வார்டுகளிலும் பாராபட்சமின்றி மாமன்ற உறுப்பினர்களின் கோரிக்கைக்கும் முக்கியத்துவம் கொடுத்து பொதுமக்களின் நன்மைக்கான பணிகளை மேற்கொண்டு வருகிறோம். பல்வேறு வழித்தடங்கள் உருவாக்கியுள்ளோம். புயலின் தாக்கம் சற்று கூடுதலாக இருக்கும் என்று வானிலை வல்லுநர்கள் தெரிவித்துள்ள நிலையில் அதற்கான அனைத்து முன்னேற்பாடு நடவடிக்கைகளையும் முழுவீச்சில் மாநகராட்சி நிர்வாகம் மேற்கொண்டு வருகிறது. பொதுமக்களும் தங்களுக்கு தேவையான உதவிகளுக்கும், குறைகளை தெரிவிப்பதற்கும் ஏற்கனவே கட்டணமில்லாத தொலைபேசி எண் 18002030401 கொடுக்கப்பட்டுள்ளது. அதை தொடர்பு கொண்டால் எல்லா குறைகளும் தீர்த்து வைக்கப்படும் என்றார்.
ஆய்வின் போது மண்டல தலைவர் நிர்மல்ராஜ், சுகாதார குழுத் தலைவர் சுரேஷ்குமார், மாநகர மீனவரணி செயலாளர் டேனியல் மற்றும் அரசு துறை அலுவலர்கள் உள்பட பலர் உடன் சென்றனர்.
